«إنت مين فى الشلة؟» .. اعرف شخصيتك وسط «صحابك» من برجك

هل فكَّرت قبل كدا إنت أنهى نوع من أنواع الصحاب؟ طيِّب سألت نفسك مرَّة إيه هو الدور اللى بتلعبه فى دايرة أصدقائك؟ فى الحقيقة كتير مننا ميعرفوش أن بُرجهم الفلكى بيتحكّم فى شخصيتهم وسط صحابهم، وبيأثَّر على الطريقة اللى بيتعاملوا بيها مع كل واحد فى «الشلة»، وعشان كدا هنقولّكوا النهارده من خلال المقال ده إيه هو دور كل فرد من أفراد «الشلة» وإيه هى شخصيته وسط صحابه من خلال بُرجه.

الحمل .. المُشاكس

فى كل «شلة» هتلاقى الشخص اللى كلهم متفقين على إنه «بتاع حوارات»، وعادةً الشخص ده بيكون «الحمل»، مش بس لأن حواراته كتير، بس لأنه مش بيسيب حد فى حاله وبيستمتع جدًّا وهو بيجُرّ شكل كل الناس و«بيشاكس» فيهم.

الثور .. العقل المدبر

لأن الثور يتميز بأنه شخصية ناضجة وعاقلة ومحل ثقة، دائمًا أصحابه بيعتمدوا عليه وبياخدوا رأيه فى مشاكلهم، وهو دايمًا بيبقى قد المسئولية وبيساعدهم يلاقوا الحل، وعشان كدا كل صحابه بيعتبروه «العقل المدبر».

الجوزاء .. الفرفوش

أينعم هو مجنون شويتين وطاقق حبتين، لكن محدش يقدر يستغنى عن وجود الجوزاء فى أى «شلة»، وده لأنه فرفوش وروحه حلوة، ودايمًا بيحلّى القاعدة وبيخلّيها لطيفة ومرحة.

السرطان .. الصدر الحنين

بما أن السرطان معروف بإنه شخصية حساسة وبتخاف على مشاعر الناس، فصحابه دايمًا بيعتبروه «الصدر الحنين» وبيحبوا يتكلموا معاه ويشتكوله من أى حاجة مضايقاهم، وعادةً بيلاقوا منه الدعم والاهتمام اللى محتاجينه.

الأسد .. البرنس

أما بقى الأسد فهو دايمًا «الملك»، هتلاقيه برنس فى نفسه كدا (أو هو فاكر نفسه كدا)، وده بيخليه ميقبلش غير بإنه يبقى الـ«leader»، هو اللى يحدد المكان اللى هتروحه «الشلة» كلها والحاجات اللى هيعملوها، وحتى الأكل اللى هياكلوه والأشخاص اللى هيبقوا موجودين فى الخروجة.

العذراء .. الأب الروحى

العذراء هو «الأب الروحى» لكل أفراد «الشلة»، دايمًا بيلجأوله لما بيحتاجوا نصيحة أو مساعدة، وهو عمره ما بيتأخر عن حد فيهم، من الآخر كدا العذراء هو «صاحب صاحبه» اللى بيقولوا عليه.

الميزان .. حلال المشاكل

لأن الميزان بيتمتع بشخصية دبلوماسية، فهو بارع جدًّا فى القضاء على التوتر والقفش بين أى اتنين فى «الشلة»، مش كدا وبس، ده قادر كمان إنه يحل أى مشكلة أو خلاف بسهولة، وده بفضل قدرته الرهيبة على الإقناع.

العقرب .. الـ«psycho»

العقرب بقى هو الـ«psycho» بتاع «الشلة»، اللى دايمًا هتلاقى كلامه عكس تصرفاته، وتصرفاته عكس كلامه، وعلى الرغم من ده إلا إنك هتلاقيه محبوب جدًّا من كل أصحابه، ميقدروش يروحوا فى حتة أو يعملوا حاجة من غيره.

القوس .. الدبش

فى كل «شلة» أو مجموعة أصحاب، هتلاقى شخص كدا «دبش» فى كلامه، مبيعرفش يزوق الكلام وبيرميه كدا زى ما هو، يعنى تقدر تقول عليه «بجح» مبيهموش حد، وغالبًا الشخص ده بيكون القوس.

الجدى .. القلاش

الجدى بيتمتع بشخصية كوميدية، لطيفة ودمها خفيف، عنده حس فكاهى، وعشان كدا دايمًا هتلاقيه بيهزر طول الوقت وبيقول إفيهات فى وسط كلامه ومبيخلصش جملة واحدة من غير ما يقلش، ولو ملقاش حاجة يقلش عليها هتلاقيه بيقلش على نفسه.

الدلو .. المصلح الاجتماعى

الدلو هو الشخص اللى هتلاقيه دايمًا بيسعى لأن الكل يبقى مبسوط، ومحدش يزعل من حد، ولو لقى واحد من صحابه بيعامل التانى بطريقة وحشة بيتدخل فورًا ويهاجم الغلطان لأنه بيحب الحق ومبيرضاش بالظلم، وعشان كدا هو «الضمير الحى» بتاع أى «شلة».

الحوت .. الطايش

الحوت هو الصاحب اللى بيوقَّع كل الناس فى بعض من غير ما يقصد، وده لأنه شخصية طايشة ومتهورة، مبتفكّرش فى أى حاجة قبل ما تعملها ولا بتحسب حساب حاجة قبل ما تقولها، ولكن بالرغم من كل ده، إلا إنه لطيف ومحبوب من كل صحابه.