برجك شبه إيه من حلويات رمضان؟

اعرف برجك شبه إيه من حلويات رمضان

الحمل .. مولتن كنافة

تبان جامدة كدة ومتماسكة، لكن بمجرد ما تقرب منها أو تدوس لها على طرف، تطفح فى وشك وتبهدلك ومتبقاش عارف تلاحق عليها منين.

الثور .. كنافة بالقشطة

هى الأصل والباقى كله تقاليع بتاخد وقتها وبتروح، ومهما زهقت منها وحبيت تغير وتجرب أصناف تانية جديدة، إلا إنك هتلف تلف وترجع لها.

الجوزاء .. كنافة نابلسية

كنافة وجبنة، تركيبة فى منتهى الغرابة، اللى هو ماتفهمش هى حلو ولا حادق ولا إيه بالظبط لكن فيه ناس كتير بتحبها وبتضعف جدًّا قدامها.

السرطان .. أم على

أصيلة وصامدة، مهما ظهرت تقاليع جديدة وأنواع وأصناف مختلفة ومبتكرة هتفضل هى الأصل، ووقت ما تحتاجها هتلاقيها قدامك وبتسد معاك فى أى حاجة.

الأسد .. كنافة بالمانجو

مفيش أحلى ولا ألذ من الكنافة بالمانجو، حاجة كدة مش أى حد يفهمها، لكن اللى بيحبها بجد وبيقدر قيمتها بيحس إنه ملك الدنيا وما فيها، يعنى خلينا متفقين إن كل يوم بيظهر أنواع جديدة ومختلفة، إلا أنها هتفضل برضه على وضعها بجد.

العذراء .. بسبوسة

حلوة وجميلة وكل الناس بتحبها، لكن لو ماتعاملتش معاها بطريقة صح وعرفت تملكها كويس، هتفرفت منك فرفتة السنين، لكن هتفضل فيها حتة ناشفة مهما قلبها اتهرى، وهى (الأطراف) اللى دايمًا بتخيلها متماسكة تحت أى ظروف.

الميزان .. زلابية

تبان ناشفة كدة من برة، لكن الحقيقة إن مفيش ألين ولا أطرى من قلبها، فيه منها أنواع كتير (سكر، عسل، نوتيلا، شوكولاتة بيضاء) المهم إن كلها حلوة ومناسبة لكل الأذواق.

العقرب .. كنافة فولكانو

إغراء ما بعده إغراء، حاجة كدة منتهى قلة الأدب، تخطف قلبك وتجبرك على إنك تدوب فيها من قبل حتى ما تقرب منها، حب من أول نظرة يعنى.

القوس .. بلح الشام

واحد من أشهر الحلويات الرمضانية اللى كلنا بنحبها، لكن دايمًا بنشتريها جاهزة من برة، لأننا ببساطة لو فكرنا نعملها فى البيت هتتعك مننا وتبوظ، بالظبط زى القوس، مالوش فى قعدة البيت ودايمًا سارح ومنطلق.

الجدى .. صوابع زينب

ناشفة كدة لا ليها فى اللف ولا الدوران ولا التقاليع، لو بتحبها لازم تحبها زى ما هى ومتحاولش تغير فيها حاجة لأن أى إضافة ممكن تعملها جايز جدًّا تغير طعمها وتبوظه تمامًا.

الدلو .. قطايف

حلو تمشى، حادق تمشى، حاف مايضرش، حتى لو قررت تاكلها نية مش هتقولك لأ، شوف بس إنت نفسك رايحة لإيه وهتلاقيها دايسة معاك فى أى حاجة.

الحوت .. كنافة جار

فيه منها أنواع وأصناف كتير وكلها مختلفة، علشان تناسب كل الأذواق وترضيهم، وكل واحد بقى يختار النوع اللى بيحبه، لكن فى النهاية الكل بيتفق على أنها لذيذة وحلوة ومناسبة لكل الأوقات مش بس رمضان.