رد كل شخص على «الواتساب» يكشف لك برجه

 عادة ما تفرض طبيعة كل شخص منا ردودًا محددة فى المواقف المختلفة، تلك الردود التى يمكننا من خلالها معرفة وفهم شخصية صاحبها، وهنا سنساعدكم على معرفة كل برج من خلال ردوده المختصرة على «الواتساب».

برج الحمل

مش بيعجبه العجب، ودايما معترض على كل حاجة، وعشان كدة كلمة «نعم؟!» هى أكتر كلمة بيستخدمها الحمل، كأسلوب تعجب عشان يفهمك أن كلامك مش عاجبه.

برج الثور

كلامه قليل، ومش بيحب الرغى الكتير، والكلام اللى مالوش لازمة، وعشان كدة دايمًا بيختصر الكلام بكلمة «أوك» عشان ينهى النقاش، وفى الآخر مش هيعمل غير اللى يريحه.

برج الجوزاء

الحياة بالنسبة له احتمالات، وكل حاجة ممكن تتغير فى لحظة، وعشان كدة كلمة «ممكن» هى أكتر كلمة بيستخدمها الجوزاء.

برج السرطان

لأنه بيخاف يصدق أى حاجة وبعد كدة يتصدم، بيحاول دايمًا يتأكد من كل حاجة بتتقال له، وده لأنه بيتأثر من أول حاجة وبيخاف جدًّا على مشاعره.

برج الأسد

مهما كنت مهمًا بالنسبة له، هتفضل كلمة «عادى» هى أكتر كلمة بيستخدمها الأسد فى كلامه معاك، وهيسيبك تتكلم براحتك وتقول اللى أنت عايزه، وده لأن اللى هو عايزه بس هو اللى هيحصل فى الآخر.

برج العذراء

العذراء بيعشق التفاصيل وبيحب يعرف كل صغيرة وكبيرة، وعشان كدة طول الوقت هتلاقيه بيسأل أسئلة من عينة «إزاى»، «ليه»، «مين»، و«إمتى» وهكذا..

برج الميزان

مش عشان هو فعلاً مايعرفش، بس لأنه مش بيحب يعرَّف حد أنه عارف أو فاهم كل حاجة، وعشان كدة لو سألته عن أى حاجة مش هيريحك، وهتلاقيه معظم الوقت بيقول لك «معرفش».

برج العقرب

لأنه مش بيصدق أى حاجة يسمعها، فمن الطبيعى جدًّا أن أكتر كلمة يستخدمها هى «بجد»، عشان يتأكد أنك مش بتهزر، وأنه لما يصدقك مش هيتصدم، وده لأنه كمان بيخاف جدًّا على مشاعره.

برج القوس

دايمًا مكبَّر دماغه من كل حاجة، عايز يخرج ويتبسط وبس ومش عايز وجع دماغ، أهم حاجة عنده راحته النفسية، أما أى حاجة تانية «فاكس» جدًّا عليها.

برج الجدى

لأن مفيش حاجة بالنسبة له بتبقى مهمة غير اللى هو شايفها مهمة، طبيعى جدًّا أنه مايهتمش بأى حاجة تانية بتتقال له أو بيسمعها مهما كانت مهمة بالنسبة لك أنت.

برج الدلو

بيحب يريَّح كل الناس، وحتى لو كلامك مش عاجبه ولا مقتنع به، هتلاقيه أوقات كتير قوى بيكبر دماغه وبيعمل لك اللى أنت عايزه عشان يتجنب أى مشاكل أو وجع دماغ.

برج الحوت

لأنه مش بيحب يشوف حد زعلان أو متضايق وبيحاول طول الوقت يطيب خاطر كل الناس، فطبيعى جدًّا أن كلمة «معلش» تبقى واحدة من أكتر الكلمات اللى بيستخدمها الحوت.

التعليقات مغلقة، ولكن تركبكس وبينغبكس مفتوحة.