نوع الفاكهة الذى يشبه صفات كل برج

الأبراج مثل الفاكهة، كل برج له صفات مختلفة، وهنا من الممكن أن تتعرف على نوع الفاكهة الذى يشبه صفات برجك.

الحمل .. تين شوكى

على الرغم من أنه حلو المذاق وكل الناس بتحبه، إلا أنك لو فكرت بس تتعامل معاه بطريقة غلط مش هتسلم من شوكه.

الثور .. كاكا

اسمها لوحده يقفلك منها ويخليك أصلا متفكرش تقرَّب لها أو تدوقها، لكن اللى بياخد الريسك ومبيهموش الشكليات دى هو الوحيد اللى بيقدر يستمتع بحلاوة طعمها.

الجوزاء .. بطيخ

طبعًا برج الجوزاء عامل زى البطيخة، يا تطلع حمرا، يا تطلع قرعة، وانت وحظك بقى.

السرطان .. موز

السرطان شبه الموز، طرى جدًّا من جوَّه، لكن لو أهملته ورميته، ممكن يزحلقك ويوقعك على جدور رقبتك بمنتهى السهولة.

الأسد .. جوز هند

يبان من برة جامد وصعب توصل له، وهتحتاج مجهود كبير عشان تعرف تتعامل معاه، لكنك لو قدرت توصل لقلبه مش هتلاقى أجمل ولا أصفى ولا أبيض منه.

العذراء .. بلح

فيه منه الرطب اللى شكله كئيب لكن طعمه حلو ومسكر، وفيه منه الأحمر اللى شكله مغرٍ لكن بينشِّف الرِّيق، وانت بس اللى بتختار هتاكل إيه منهم.

الميزان .. أناناس

شكله من برَّه حلو وجذاب ومغرٍ جدًّا، لكنك للأسف مش هتعرف توصل لقلبه غير لو استخدمت الطريقة المناسبة، غير كده هتبهدله وتبهدل نفسك على الفاضى.

العقرب .. يوسفى

على الرغم من مزازته، إلا أنه مفيد جدًّا ولذيذ ومُسلٍّ، ومحدش يقدر يستغنى عنه وعن وجوده.

القوس .. رمان

لذيذ ومفيد وناس كتير بتحبه، لكن محدش هيقدر يستمتع بطعمه فعلاً إلا لو كان عنده صبر وطاقة يقعد يقشره، وميزهقش مهما بهدله.

الجدى .. بابايا

رغم أنه مفيد جدًّا وطعمه حلو ومميز، إلا أنك عشان تلاقيه أو توصل له محتاج تدور كتير جدًّا لأنه عملة نادرة.

الدلو .. تفاح

بالرغم من أنه موجود طوال السنة بأنواعه وألوانه الكتير، إلا أن مفيش حد بيزهق منه ولا بيبطل ياكله، يعنى يعتبر شىء أساسى فى حياتنا منقدرش نستغنى عن وجوده.

الحوت .. مانجو

أصنافها كتير جدًّا وملهاش حصر، وأحجامها وطعمها كمان مختلف ومتنوع، لكن فى النهاية كلنا متفقين على حبها، وكل واحد حسب ذوقه هيلاقى منها اللى يناسبه.