10 شخصيات هتلاقيها فى رسائل الـ«Others»

الفيسبوك مبقاش مجرد موقع تواصل اجتماعى، ده بقى أسلوب حياة بالنسبة لناس كتير، مكان بيقضوا فيه معظم وقتهم ما بين التصفح والدردشة والتعارف والتسلية وغيره، وعشان كده من الطبيعى إننا نقابل أنواع مختلفة من الشخصيات على السوشيال ميديا، ولأن أغربها يكون موجودًا فى رسائل الـ«Others»، فسنعرض لكم 10 أنواع مختلفة من الشخصيات نجدهم فى رسائل الـ«Others».

1.الكلاسيكى

النوع ده من الأشخاص دايمًا بيبدأ كلامه بـ«هاى ممكن نتعرف»، «أنا فلان الفلانى».. وبيبقى هدفه الأول والأخير هو إنه يتعرف على شخصيات جديدة، وعادة هتلاقيه بياخد نفس الرسالة «copy» و«paste» ويبعتها لكل الأكونتات اللى بتقابله.

2.المتطفل

«مين مزعلك»، «شكلك حزينة»، وغيرها من الرسائل اللى بيبعتها النوع ده من الشخصيات اللى دايمًا بتحب تتدخل فى حياة غيرها وبتعتمد على الأسلوب ده كمحاولة مختلفة للتعارف ولفت الانتباه.

3.المتحرش

وهو الشخص اللى بيستخدم كلام غير لائق عشان يعبر بيه عن إعجابه، وطريقته دايمًا بتبقى أشبه بالتحرش اللفظى، والنوع ده بنلاقيه كتير فى رسائل الـ«others»، وطبعًا بيتعمله «بلوك» فى ساعتها من غير تفكير.

4.العاشق الولهان

«انتى مرتبطة؟»، «أنا بحبك وعايز اتجوزك»، والجمل دى بيستخدمها بعض الأشخاص لسببين، الأول إنه يحسس اللى قدامه إنه مش بيتسلى وإنه فعلاً عايز علاقة جادة وحقيقية، والتانى إنه يبقى فعلاً بيدور على عروسة.. وفى الحالين مش بيترد عليه.

5.الملاك الحارس

«ماشاء الله»، «ربنا يحميكى»، «ربنا يحفظك» وغيرها من الجمل اللى بيستخدمها النوع ده من الشخصيات، واللى بيبقى معظمها عبارة عن أدعية، وعلى الرغم من أنها تأخذ أحيانًا طابعًا محترمًا ومهذبًا، لكنها فى النهاية تُصنف كنوع من أنواع محاولات التعارف.

6.المنتقم

«هاى».. «ممكن تردى».. «تصدقى أنا غلطان إنى عبرتك».. وبيكمل كلامه بسلسلة من الإهانات كنوع من أنواع رد الكرامة والحفاظ على كبريائه اللى اتهان بعدم الرد على رسائله، وطريقة لاستفزاز الطرف التانى عشان يرد عليه.

7.المعقد

هو الشخص اللى حياته مليانة عقد نفسية وبيحاول يخرجها، فبتطلع على الناس على الإنترنت، سواء فى صورة إهانات أو تعليقات سخيفة أو غيرها من الرسائل المستفزة بوجه عام، وده بيخليه ينتقل تلقائيًّا من قائمة رسائل الـ«others» لقائمة البلوك.

8.معرفة قديمة

وده غالبًا بيبقى شخص كنت تعرفه زمان وقطعت علاقتك بيه وبيحاول يوصل الود ويرجع العلاقات من تانى، وعلى الرغم من إنك بتبقى شايف مسجاته، إلا أنك بتفضل تتجاهلها وماتردش عليها لأنك مبقيتش عايزه تانى فى حياتك.

9.الكوميدى

هو الشخص اللى بيبعت رسائل كوميدية ودمها خفيف، تخلى أى حد يضحك بمجرد ما يشوفها أو يقراها، وعلى الرغم من أنه عادة مش بيكون مهتم أو مستنى أى رد، إلا أنه فى الحقيقة واحد من أكتر الأنواع اللى بيترد عليها.

10.أمير الأحزان

«محتاج اتكلم معاكى شوية»، «عايز أخد رأيك فى حاجة»، «من فضلك ردى عليا»، «أنا حياتى متوقفة على كلمة منك»، ودى شوية من الجمل اللى بيستخدمها النوع ده من الشخصيات المحطمة اللى بتدور على أى شخص تتكلم معاه، ومعندهاش وسيلة غير الإنترنت.