صديقتى وكاتمة أسرارى ورفيقة مشوارى وأمى 5 بنات وماما فى جلسة تصوير خاصة لـ «7 أيام»

الأمومة هى الطبيعة هى الحب بدون شروط وهى الحنان والمشاعر هى غريزة تجدها فى كل أم، ولكنها أيضًا مجهود، صبر، قوة احتمال ومسئولية، مسئولة عن تكوين شخصيات ناضجة قادرة على مواجهة الدنيا والمجتمع والنجاح، لتكمل المسيرة فى بناء أجيال -بعد أجيال- سوية ونافعة للمجتمع منفتحة قادرة على تغيير المستقبل. ولكن هناك اختلافًا فى طريقة تربية البنات وتكوين شخصياتهن، وكان السائد أن التشدد وفرض الرأى هما أنجح طرق تربيتهن، ولكن بعد سؤال خمس أمهات رائعات مع بناتهن عن طريقة تربيتهن والعوامل الأساسية لنجاح علاقتهن وقوة ارتباطهن ببعضهن، اتضح أن الموضوع بسيط وسهل فهو يعتمد على الهدوء والمرونة والصبر والثقة والتفاهم والحب وأن التشدد لن يعطى أى نتيجة إيجابية، ففى النهاية هن أمهات ناجحات جدًا فى المجتمع استطعن بناء شخصيات قوية، واعية ناجحة ولديها إرادة قوية تخطف القلوب من أول لقاء معها، فهؤلاء الأمهات نجحن فى تقديم فتيات رسمن خطوط مستقبلهن رغم صغر سنهن، ومن خلالهن وجدت مدى ارتباطهن وحبهن لبعضهن، بينهن صداقة قوية، علاقة مليئة بالمرح والانسجام.

قامت مجلة 7 أيام بعمل فاشون شوت خاص مع خمس أمهات وبناتهن نظهر فيه مدى صداقة وقوة العلاقة بينهن .

 صافى الصفتى

ستايلنج وإخراج فنى: سحر عزب
تصوير: حاتم صالح

نيفين سعدة

أم لـ5 أبناء ومتفرغة لتربية أبنائها

 

علاقتى ببنتى شد وجذب وأصحاب أوى، أنا ونور متشابهتان فى حاجات كثيرة، أنا صاحبة بنتى وصاحبة صحابها، بستمتع لما بنعمل شوبينج مع بعض ونسافر مع بعض وبنحضر دروس spinning and aerobics مع بعض، وبشوف أن تربية البنات بجد ممتعة لأنهم مريحين، أما عن الجيل ده فهو عنده معاناة أكثر وتحديات لأن العلاقات بين الناس بقت صعبة، وسبب نجاح علاقتى مع بنتى إنى مرنة معها، وأفهم أن الزمن تغير فلا يمكن أن أربيها بنفس الطريقة التى تربيت عليها. نور فى ثلاث كلمات: حلوة، قوية جدًّا وصريحة جدًّا.

نور فاروق

16 سنة تريد أن تصبح محامية

أنا ومامتى مختلفتان ومتشابهتان فى نفس الوقت بس تفكيرنا زى بعض وبنتفق مع بعض جدًا وأصحاب جدًا، الناس كلها بتقول لى إنى شبهها، بستمتع لما بنعمل شوبينج مع بعض لإنها بتختار لى حاجات عمرى ما أفكر فيها، الثقة اللى بينا هى أكتر حاجة بتقوى علاقتى بها. مامتى فى ثلاث كلمات: حلوة، طيبة ومرحة.

 دينا المسيرى

أم لولد وبنت وتعمل مصممة أزياء

عن علاقتها بمامتها قالت: أهتم بمامتى، وهى ملهمتى وبحب اختياراتها فى تصميم الأزياء، الثقة والصداقة من أهم الحاجات اللى بتقوى العلاقة بينى وبين مامتى وهى متفهمة مش منتقدة علشان كده بحكى لها عن أى حاجة وأثق فى رأيها، وعلشان أنا معنديش إخوات بنات فهى صاحبتى جدًا وبنفهم بعض حتى لو بتخانق مع أخويا هى بتدعمنى أو مشكلة مع صحابى هى الوحيدة اللى بتفهمنى وهى عندها الخبرة، إحنا متشابهين فى إننا بنحب نتفرج على فيديوهات للـ make up ونجربها على بعض وبنحب الكلاب والموسيقى جدًا. مامتى فى ثلاث كلمات: داعمة مرحة ومتفهمة .

ماسة حسنين 17 سنة

تريد أن تدرس الحقوق

ماسة فى ثلاث كلمات: واثقة من نفسها، قوية الإرادة جدًا، وحنينة.

قالت عن علاقتها بماسة، علاقتى بماسة إننا صحاب وبتحكى لى عن كل حاجة، وأنا بثق فيها وبحب لما تحكى لى هى وصاحباتها عن أى حاجة، تربية البنات ممتعة جدًا علشان بتلاقى نفسك فيها، إحنا متشابهين أنا وماسة فى إننا حساسين وعاطفيين جدًا، بنحب الناس وأصحابنا والسفر والشوبينج والقراءة والرقص وبستمتع جدًا لما بنعمل يوم girls day out، والجيل ده محظوظ جدًا لإننا إحنا كأمهات أسهل بكثير فى علاقتنا معاهم عن آبائنا، عندهم حرية لم تكن لدينا، وفى التربية الثقة التى تعطيها هى التى تقوى العلاقة بيننا، وبالأخص فى تربية البنات إنك تكسبين ثقتهن وتستوعبين مشاكلهن بهدوء ودون التوبيخ علشان ده اللى هايخليهم يحكولك على كل حاجة.

إيمان فهمى

أم لـ3 أولاد وبنت تعمل فى مجال الـNutrition Service

تحاورت معها عن علاقتها بسلمى ومدى قوة علاقتهما، فردت إحنا قريبين جدًا من بعض، وسلمى بالنسبة لى صديقة أكثر منها ابنة، سلمى بتحكى لى أى حاجة وبتاخد برأيى فى كل شىء وهى شخصية سلسة فى التعامل، وأكثر حاجة بتخلى العلاقة ما بينا قوية إنى بفكر من وجهة نظرها هى وبحاول أكون متفهمة لما تحكى لى على حاجة، مثلاً مش عجبانى مابهاجمهاش بالعكس بفهمها بالراحة. أنا وسلمى متشابهين فى إننا هاديين ولما بنحط فى دماغنا حاجة بنعملها، بستمتع جدًا مع سلمى فى الغناء والكاريوكى نايتس، وحقيقى تربية البنات ممتعة جدًا ولو مكانش عندى بنت كان هايفوتنى كتير، وعن الجيل ده فهم منفتحين أكثر أمامهم إغراءات وعوامل تشتيت كثيرة بس عندهم رأى ومستقلين وفاهمين. سلمى فى ثلاث كلمات: قلبها طيب جدًا، بتهتم جدًا بالناس ومعطاءة جدًا.

سلمى أبوالفضل

16 سنة تريد أن تدرس فى لندن تخصص الـmarketing وترجع تشتغل فى مصر

سألتها عن علاقتها بمامتها وإن إيه العامل الأساسى لنجاح علاقة الأم بابنتها، فقالت مامتى بتفهمنى جدًا، أنا وماما متشابهتان جدًا حتى فى طريقة تعاملنا مع الناس وفى الاختيارات وبنفكر بنفس الطريقة، أنا ومامتى أصحاب بقول لها على كل حاجة وباخد بنصيحتها فى أى حاجة لأنها بتدعمنى، وأكثر حاجة بحب أعملها معاها إننا بنحب نغنى
ونرقص مع بعض وبنعمل كاريوكى نايتس وبجد بنستمتع جدًا. مامتى فى ثلاث كلمات: بتهتم بيا جدًا، كريمة
ومشجعة .

هبة شاهين

أم لبنتين، محامية وتدرس اليوجا وتدرس القانون أيضًا فى إنجلترا

سألتها عن علاقتها بمامتها قالت : انا بحبها جدآ وهى ملهمتى وبتفهمنى جدًا وهادئة وبتدينى أحسن نصائح، وأكثر حاجة أنا شبه مامتى فيها إننا بنحب نظهر أحسن ما فينا ونعطى أحسن ما عندنا، وإحنا أصحاب وقريبين جدًا من بعض بحكى لها على كل حاجة علشان هى متفهمة وقربها منى بيزودنى بالثقة والأمان، أكثر حاجة بحب أعملها مع مامتى لما نقعد فى السرير نحكى ونتفرج على حاجات، وأوقات بجد بنضحك مع بعض كثير من غير سبب. مامتى فى ثلاث كلمات: قوية، معطاءة وملكة.

سميحة الأنصارى

17 سنة حلمها أن تدرس فى لوس أنجلوس وتتخصص فى الـDevelopment،

علاقتى بسميحة إنى بسمعها أكثر، أنا وسميحة بينا حاجات كثيرة متشابهة وهى إننا لما نحط حاجة فى دماغنا هنوصل لها، وبنحب نجرب حاجات جديدة، وأسعد وقت بالنسبة لى لما أكون معها، تربية البنات ممتعة جدًا فهمت معنى الـmother earth، أنا صاحبة بناتى والشىء الذى تعلمته عند تربية البنات أنك كأم تحتفظين بلحظات معهن بمعنى آخر أن تحرصى على إيجاد لحظات مهمة وعاطفية لأنها ستتخزن فى ذاكرتهن، وأكثر حاجة بتقوى العلاقة بين الأم وابنتها هى الحب دون شروط أو مقابل.. غلطت بحبها فى كل الأحوال بحبها، سميحة فى مرة دعت صاحباتها وأمهاتهن فى درس اليوجا الذى أدرسه وفى هذه اللحظة شعرت بالسعادة وأنها تثق فى وتشاركنى فى شىء ليس من اهتمامها، وأحب جدًا لحظة الصدق بيننا حتى إذا كانت نظرة، وعن الجيل ده فهو جميل منفتح وصادق جدًا ولديه شفافية ووعى ومعلومات كبيرة تستطيعين التحدث معه. سميحة فى ثلاث كلمات: طاقة جميلة، مواهب كثيرة وحنينة.

مها بليغ

أم «ولد وبنت» وتعمل بالبورصة

سألتها عن علاقتها بلينا، فقالت: علاقتى بابنتى هى أحلى حاجة فى حياتى.. من يوم ما اتولدت غيرت كل حاجة فى حياتى وغيرت فكرتى عن الحب فهى الحب الحقيقى حب دون شروط، إحنا متشابهين فى حاجات كثيرة فى الشخصية، تربية البنات ممتعة أوى فإحنا أصحاب أكثر من أنها بنتى، بحب أخرج معاها جدًا وبحب نسافر مع بعض ونحكى لبعض عن كل شىء، والجيل ده مختلف عنا جدًا ونمط حياته أسرع منا وأذكى من جيلنا لأن لديه المعرفة والتكنولوجيا، وأكثر حاجة بتخلى العلاقة قوية بين الأم وابنتها إنك تكونى صديقتها وتعطيها الوقت والاهتمام، وألا تفرضى عليها شخصيتك تحبيها كما هى أى كان شخصيتها. لينا فى ثلاث كلمات: حنينة، كريمة وسعيدة.

لينا وجدى

15 سنة تريد أن تدرس فى الخارج

سألتها عن علاقتها بمامتها، فقالت: أنا ومامتى متشابهتان فى حاجات كثيرة، بحبها جدًا جدًا، بتثق فى جدًا وده بيشجعنى إنى أقول لها على أى حاجة وعمرى ما أكذب عليها فى أى حاجة، وهى أكثر شخص تعرف عنى حاجات أكثر من صاحباتى وبرتاح معاها هى أفضل صاحباتى، أكثر حاجة باستمتع بها معها لما بنسافر ونكتشف ثقافات جديدة وأكلات جديدة وأماكن جديدة، أعتقد أن أكثر حاجة تقوى العلاقة بينى وبين أمى هى الثقة والحرية وده بيخلينى أكون محل ثقتها.